தனிமை இரவில்
மொட்டை பாறை நிறைக்கும்
சில்வண்டின்
ரீங்காரம் !
நம் நீண்ட தூர
இடைவெளியை
பெருமூச்சு நிரப்பும்,
மெளனமாய்
ஒரு கவிதை
உடைந்து சிதறும்!
கார்மேகம் கடக்க
நிலவொளி
மழை பொழியும்!
தவளை பாடும்!
நானும் பாடுவேன்!
ஒற்றை பனை மரத்தில்
பிய்ந்து தொங்கும் பனையோலை
காற்றில் ஆடும்
"சர,சர,சர"!
கள்ளிப்பூ
பூக்கும் காலம்
வந்தபாடில்லை!
ஒற்றை பனைக்கு ;
நிலா துணை .......
எனக்கு ,வானம்!
பாசி படர்ந்த
பழுப்பு சுவரில்
கரித்துண்டு கிறுக்கலில்,
நிர்வாண பெண்ணின்
கோட்டோவியம்!
ஏதோ ஒரு பிக்காசோ!
பெண்குறி பற்றிய,
பின் நவீனத்துவ
கவிதையொன்று
காணக்கிடைக்கும்,
ஏதோ ஒரு பாப்லோ நெருதா!
"தண்ணீ தொட்டீ தேடீ வந்த" கேட்கும்,
யேசுதாஸ்,tms ன்
ஏதோ மி(எ)ச்சங்கள்!
மொக்கு சந்தில்
கஸ்டமருக்கு
காத்திருக்கும் சரசக்கா!
ரம்பை,ஊர்வசி,மேனகை வரிசை போலும்!
tasmac ஒரு போதிமரம்,
tasmac ஒரு கலைக்கூடம்!
ஓவியன்,
கவிஞன்,
பாடகன்,
பேச்சாளன்………………!
"கலை!……………
அள்ளியள்ளி பருக வேண்டிய ,
அமிர்தமடா அது!"
கன்னம் வழிந்த
வாந்தியை
நாயொன்று மோப்பமிட,
மூத்திர சந்தில்
மூச்சற்று கிடக்கும்
கிழவனுக்கு ,
வாய்த்ததெந்த
ஞானநிலை?
கொடுத்து....... கொடுத்து,
வறுமையில் வாடும்
வள்ளல் நான்!
கையேந்தி நிற்க்கிறேன்
யாசகன் போல!
"எச்சை கையில்
காக்காய் ஓட்டாத,
கஞ்சப்பிசிநாரி "!
ஒரு முத்தம்
கேட்டதற்க்கு
ஓராயிரம்
கதை சொல்கிறாள்!
பூக்கும்
தாவரங்கள்
இரண்டு லட்சத்து
ஐம்பதாயிரம்.
முத்தமிட நெருங்கையில் ,
இதழ்கள் விரிக்கும்
பூங்கொடி,
கண்கள் ,மூடும் .....
"தொட்டால் வாடி" !
தாவரங்களில்
பெண்
அரியவகை!
வாசலில்
நீர் தெளித்த
தடம் போல,
நீ கோபத்தில் தெளித்த
வார்த்தைகள் சிதறிக்கிடக்கும்!
உன் தோழிகளுக்கான
பகட்டுக்களில்,
நாம் இழந்த கணங்கள்,
உனக்கு தேவையான பொருட்களை விட
விலை அதிகம்!
என் கோபம் உணரவில்லை,
உன் கன்னத்தில்
கை பதித்த வன்மம்.,
நீயும் உணர்ந்தபாடில்லை,
என் வியர்வையின்
போராட்டங்களை!
நீ விட்டுச்சென்ற தனிமை
வீடு நிறைக்கும்,
உன் கொலுசொலியும்
சிரிப்பையும் போல,
ஒரு மென் சோகம்
இதயம் குடையும்
ஒரு மண்ணுளி பாம்பை போல!
எப்போது வருவாய்?
உன் வீட்டை விட்டு,
நம் வீடுக்கு?
உனக்காக வாங்கிய உனக்கு பிடித்த
பட்டு புடவைக்கு
என்ன பதில் சொல்ல?
